Robredo puwede rin sa DDB at PDEA – Sotto
MANILA,Philippines — Maaari ring pamunuan ni Vice Pres. Leni Robredo ang Dangerous Drug Board (DDB) at Philippine Drug Enforcement Agency (PDEA) kung seryoso talaga si Pangulong Duterte sa kanyang hamon sa bise presidente na pamunuan nito ang giyera ng gobyerno laban sa ilegal na droga.
Sinabi ito kahapon ni Senate President Vicente “Tito” Sotto III tungkol sa huling hamon ni Duterte kay Robredo.
“If it’s a serious proposal, it’s best if the VP is appointed as DDB chair and concurrent PDEA Director General,” sabi ni Sotto.
Tutol naman naman si Sen. Ronald dela Rosa na bitawan ng Pangulo ang kampanya laban sa ilegal na droga dahil posibleng matulad sa Mexico ang Pilipinas.
Ipinahiwatig din ni Dela Rosa na walang karanasan si Robredo sa paglaban sa ilegal na droga.
Naniniwala naman si Sen. Sherwin Gatchalian na nais ipunto ng Pangulo na dapat magtuluy-tuloy ang kampanya laban sa illegal drugs at isa itong kumplikadong isyu.
Sabi ni Gatchalian, may kapangyarihan ang Pangulo na ilipat ang ilang trabaho sa isang miyembro ng Gabinete.
Ipinunto naman ni Sen. Koko Pimentel na ang Pangulo ang chief executive o nagpapatupad ng batas at hindi niya maaaring ipasa ang nasabing trabaho sa hindi niya “alter egos.”
Hindi kasama si Robredo sa mga miyembro ng Gabinete matapos hindi bigyan ng posisyon ni Duterte.
- Latest
