PhilHealth, ospital nagkasundo na - Sen. Go
MANILA, Philippines — Inihayag ni Sen. Bong Go na nagkausap at nagkasundo na ang Private Hospitals Association of the Philippines, Inc. (PHAPI) at ang Philippine Health Insurance Corporation (PhilHealth) na sila’y magtutulungan upang mabayaran ang “unpaid claims” at maresolba na ang nasabing isyu.
Tiniyak din sa publiko ni Go, bilang tagapangulo ng Senate committee on health, na ipagpapatuloy ng pamahalaan ang pagbibigay ng dekalidad at abot-kayang serbisyong medikal sa lahat ng Filipino.
“Open ang linya ko para po maging tulay sa kanila. Thankfully, they have reached an agreement to work together to resolve their issues when they talked in front of me yesterday. Ang importante hindi maapektuhan ang serbisyo sa mga pasyente,” aniya.
Nakaharap ni Go sina PHAPI President Rustico Jimenez at PhilHealth President Ricardo Morales sa isang pribadong pulong kung saan nagkaisa ang PhilHealth at PHAPI na magsasama sa pagkilos para maayos na ang outstanding claims ng private hospitals, gayundin ang paglansag sa umano’y fraudulent claims sa ahensiya.
Siniguro ng pamunuan ng PhilHealth sa private hospitals na nakahanda itong makinig sa kanilang mga concerns. Sinabi rin ng PhilHealth na magsasagawa ito ng quarterly regional “reach-out” forums kung saan imbitado ang mga ospital para maipahayag ang kanilang mga hinaing.
Sinabi naman ni Sen. Go, mahalaga na matiyak na ang pondo ng PhilHealth ay hindi masasayang at magagamit nang wasto para sa kapakanan ng mga pasyenteng nangangailangan.
“Now their lines are open to complaints. So it’s not true that private hospitals will pull out from PhilHealth,” ani Go.
Noong Lunes ay nagbanta ang 600 miyembro ng PHAPI na hindi na mag-rerenew ng kanilang PhilHealth accreditation sa 2020 dahil sa unpaid claims na umabot na sa P2.5 billion.
- Latest