Publiko hanga sa House - SWS
MANILA, Philippines — Hayag na sinusubaybayan ng mga Pilipino ang kanilang mga mambabatas at ito’y makikita sa resulta ng pinakahuling Social Weather Station (SWS) survey na nagbigay sa House of Representatives, sa ilalim ng pamumuno nina Speaker Alan Peter Cayetano at Majority Leader Martin Romualdez, ng “+49 percent net approval rating.”
Ayon kay Albay Rep. Joey Sarte Salceda, chairman ng House Ways and Means committee, ang naturang mataas na iskor ay malinaw na pahiwatig ng paghanga ng publiko sa mahuhusay na mga nagawa ng mababang kapulungan ng Kongreso sa loob ng kulang sa tatlong buwan.
Sa survey ng SWS, 64% ng mga Pilipino ay umapruba sa pamumuno ni Cayetano habang 14% naman ang hindi katig kaya ‘net 49%’ ang naging iskor, na pinakamataas sa kasaysayan ng Kamara, na katulad din ng resulta ng naunang survey ng Pulse Asia. Saklaw ng dalawang survey ang ‘third quarter’ ng taon na unang tatlong buwan naman ng Kamara sa ilalim ng bagong pamunuan nito.
Kasama sa matagumpay na nagampanan ng Kamara ang 2020 General Appropriations Act at ang pagpapatibay sa ilang mahahalagang repormang batas sa pananalapi gaya ng “Alcohol and Vape tax, Corporate Income Tax and Incentives Rationalization Act (CITIRA), Passive Income and Financial Intermediary Tax Act (PIFITA), Retail Trade Liberalization Act.”
Ayon kay Salceda, kasalukuyang tinututukan at binubusisi ng Kamara ang ilang mahahalagang panukalang batas kasama ang paglikha ng Department of Disaster Resilience, Department of Overseas Filipino Workers at Department of Water Resources.
- Latest
