Mahigit 9,000 pulis nasibak

Sa ilalim ng Duterte gov’t

MANILA,Philippines — Umaabot sa mahigit 9,000  mga tiwaling pulis ang natanggal sa serbisyo sa Philippine National Police (PNP) matapos na mapatuna­yang guilty sa kasong administratibo sa ilalim ng administrasyon ni Pa­ngulong Rodrigo Duterte  simula noong 2016 kaugnay ng determinadong internal cleansing program ng organisasyon.

 Ito ang inihayag ni PNP Officer-in-Charge Police Lt. Colonel Archie Gamboa sa pagharap nito sa  media kahapon.

Sinabi ni Gamboa na simula Hulyo 2016 hanggang Setyembre 20, 2019, aabot sa kabuuang 9,172 pulis o nasa 4.7 % ng kabuuang PNP personnel na aktibo sa serbisyo ang napatawan ng kaparusahan sa kasong administratiba kaugnay ng pagkakasangkot sa samut-saring kasong kriminal at paglabag sa patakaran gayundin sa regulasyon ng PNP.

Kabilang sa mga napatawan ng kaparusahan ay nasa 2, 806 personnel na nadismis sa serbisyo, 535 ang na-demote ng ranggo; 4,721 ang nasuspinde, 762 ang na-reprimand, 60 ang restricted to quarters, 208 ang ti­nanggalan ng suweldo at 80% ang natanggalan ng mga prebilihiyo.

Sa kabuuang 2,806  nadismis na mga pulis, 454 dito ang sangkot sa ilegal na droga; 352 ang napatunayang positibo sa paggamit ng ilegal na droga; 102 ang sangkot sa mga kasong may kinalaman sa ilegal na droga.