Mga umaresto kay Lee protektahan - Gordon

MANILA, Philippines – Iginiit ni Sen. Richard Gordon kay Justice Secretary Menardo Guevarra na proteksyunan ang mga pulis at opisyal ng barangay sa Mexico, Pampanga na unang umaresto sa drug suspect na si Johnson Lee.

Nangangamba si Gordon na posibleng may mangyari sa mga pulis at opisyal ng barangay kaya dapat matiyak na matatanggap ng korte ang kanilang testimonya.

“Para sa ganu’n nakakasiguro siya na whatever happens, if he dies accidentally, there is that testimony already that is admissible in court,” sabi ni Gordon.

Maaari aniyang makapagbigay ng karagdagang testimonya ang tatlong pulis ng Mexico, Pampanga na sina Police Staff Sergeants Jerome Bugarin, Marlon dela Cruz at Jackson Mariano.

Sinabi rin ni Gordon na mahalagang tumibay ang ebidensiya na nagkaroon ng cover up sa buy-bust operation noong Nobyembre 2013.

“During the hearing ipinakita namin ‘yung litrato ni Ding Wenkun. Sabi nila definitely hindi ‘yan ang inaresto namin. That was a very, very strong evidence that there was a cover-up because after that Baloyo took the real McCoy, Johnson Lee, and after that nawala na siya,” sabi ni Gordon.

Matatandaan na si Lee ang may-ari ng bahay na ni-raid  ng 13 pulis sa pangunguna ni Major Rodney Baloyo sa Woodbridge Subdivision sa Mexico, Pampanga noong Nob. 13, 2013.

Nasa desisyon na rin umano ni Guevarra kung ipapasok niya ang mga testigo sa Witness Protection Program.