Albayalde bumaba na sa puwesto
MANILA,Philippines — Matapos ulanin ng kaliwa’t-kanang kontrobersiya tulad ng sa ‘ninja cops’ at recycling ng droga, nagdesisyon nang bumaba sa puwesto si Philippine National Police Chief Police General Oscar Albayalde na epektibong nasa non-duty status mula kahapon mas maaga nang tatlong linggo sa kaniyang pormal na pagreretiro sa serbisyo.
Sinabi ni Albayalde na ang kaniyang desisyon ay naglalayong bigyang daan ang pormal na pagpili ni Pangulong Rodrigo Duterte ng susunod na hepe ng PNP.
Si Albayalde ay nakatakda sanang magretiro sa Nobyembre 8 pagsapit ng kaniyang ika-56 taong kaarawan.
Nagpahayag ng pasasalamat si Albayalde kay Pangulong Rodrigo Duterte sa pagtitiwala at kumpiyansa nito sa kanya at pagbibigay sa kanya ng oportunidad na mamuno sa PNP at maglingkod sa mga Pilipino.
Nanawagan din si Albayalde sa mga pulis na ipagpatuloy ang paglilingkod sa kapwa nila Pilipino at huwag magpademoralisa sa mga hamon.
Sa isang panayam sa telebisyon, sinabi ni Albayalde na ang pagbibitiw sa puwesto bilang hepe ng PNP ang pinakamagaling na desisyon para pangalagaan ang morale ng police force.
Sinabi pa niya na sa paglisan sa PNP ay nakakaluwag siya sa stress habang nilalabanan niya ang mga alegasyon na prinotektahan niya ang kanyang mga tauhan na naakusahang nagbebenta ng mga nakukumpiskang droga.
Idinagdag niya na sa kanyang desisyon ay mailalayo ang PNP sa ibayong demoralisasyon.
Sinabi naman ni Department of Interior and Local Government Secretary Eduardo Año na nais na ni Albayalde na sumailalim na sa Non-Duty Status simula pa noong nakalipas na linggo.
Inamin ni PNP Spokesman Brig. Gen. Bernard Banac na personal ang dahilan at bunga na rin ng pagdadawit kay Albayalde sa ‘ninja cops’ kaya pinili nitong mag-avail ng Non -Duty Status (NDS).
Nitong Lunes ay nagkaroon ng simpleng turnover ceremony nina Albayalde at Gamboa na pinangunahan ni Año.
- Latest
