Sumukong convicts, 352 na

MANILA, Philippines – Umabot na sa 352 ng kabuuang 1,914 convicts na napalaya sa Good Conduct Time Allowance (GCTA) ang sumuko.

Sa pinakahuling datos ng Philippine National Police kahapon, sinabi ni PNP spokesman Brig. Gen. Bernard Banac na pinakamarami sa mga nagsisuko ay sa Luzon.

Kabilang sa  sumuko ?ay 15 mula sa National Capital Region Police Office, 33 sa Police Regional Office (PRO) 1; 35 sa PRO2, 24 sa PRO3, 27 sa PRO4, 51 sa Calabarzon (Cavite, Laguna, Batangas. Rizal at Quezon), 21 sa PRO5, 32 sa PRO6, 33 sa PRO7, 8 sa PRO8, 20 sa PRO9, 15 sa PRO10, 9 sa PRO12, 12 sa PRO13 at 18 sa PRO-Cordillera. 

Ayon kay Banac, batid nila na hindi lahat ng pinalayang preso ay susuko pero magandang kaganapan na rin ang maagang pagsuko ng marami sa mga ito. 

Hinihintay na lamang ng PNP ang hanggang Setyembre 19 bago ideploy ang tracker teams upang arestuhin ang mga convicts na magmamatigas na sumurender.

Magugunita na binigyan ni Duterte ng palugit na 15 araw ang mga convicts para sumuko at kung hindi ay ipatutupad ang ‘shoot to kill order’ laban sa mga ito. Danilo Garcia