Panibagong tropical depression papasok ng PAR anumang oras

MANILA, Philippines — Ganap nang naging bagyo ang binabantayang low pressure area na dahan-dahang lumalapit sa Philippine Area of Responsibility.

Nakita ito sa layong 1,180 kilometro silangan ng Kabisayaan kaninang madaling araw, ayon sa 4 a.m. update ng PAGASA.

Ang bagyo ay tuluyang naging tropical depression kagabi.

Taglay nito ang hanging may lakas na 45 kilometro kada oras malapit sa gitna at pabugsu-bugsong hangin na 55 kilometro kada oras.

"Posibleng pumasok ito ng Philippine Area of Responsibility anumang oras ngayong araw," ani Meno Mendoza.

Ang nasabing sama ng panahon ay "halos hindi gumagalaw."

Dahil sa trough ng bagyo, makararanas naman ng maulap na kalangitan na may kalat-kalat na pag-ulan, pagkidlat at pagkulog ang Kabikulan.

Dahil din sa tropical depression, magiging maulap at magkakaroon ng kalat-kalat na pag-ulan at thunderstorms ang Silangang Kabisayaan.

Samantala, umiiral pa rin ang southweet moonsoon, o Hanging Habagat, sa Luzon.