Corruption probe vs Acosta, Erfe kinumpirma ng Ombudsman
MANILA, Philippines — Kinumpirma ng Office of the Ombudsman na iniimbestigahan na nila ang mga reklamo ng korapsiyon laban kina Public Attorney’s Office (PAO) chief Persida Acosta at forensic laboratory chief Dr. Erwin Erfe.
Kasunod ito ng manifestation na isinumite sa Ombudsman ng PAO lawyers na humihiling na suspendihin sa puwesto sina Acosta at Erfe dahil sa isyu ng katiwalian sa pondo ng PAO.
“Respondent Acosta has ordered her cohorts to edit, revise and antedate PAO’s purchase requests, purchase orders, procurement forms, memoranda, and other documentation in order to make it seem legitimate and to justify the diversion of the PAO’s budget to the Dengvaxia victims,” nakasaad sa complaint na inihain ni Atty. Wilfredo Garrido.
Tiniyak naman ni Ombudsman Samuel Martires na patas na susuriin ng kanyang tanggapan ang mga kaso na ihaharap ng kapwa partido.
Nakatakda na ring timbangin ng mga imbestigador mula sa Ombudsman ang ebidensyang ihahain ng mga akusado at complainant bago magdesisyon kung iaakyat ba ang mga kaso sa Sandiganbayan.
Ayon naman kay Acosta, walang katotohanan at pawang gawa-gawa lamang ang mga naturang paratang sa kanya at kay Erfe.
Aniya, tiwala siya na ang mga alegasyong ipinupukol sa kaniya ay upang ilihis ang atensiyon ng publiko sa kontrobersiyal na dengue vaccine na umano’y dahilan ng pagkamatay ng ilang mga kabataan.
Hinamon din ni Acosta si Garrido na patunayan sa korte ang alegasyon sa kanya kundi ay magsasampa siya ng disbarment case laban dito.
Matatandaang, mahigit 100 bata ang isinailalim ng PAO sa autopsy matapos masawi ang mga ito dahil sa kontrobersiyal na dengvaxia vaccine. Angie dela Cruz
- Latest
