Paglago ng ekonomiya 5.5% noong Q2; bumagal, lumihis sa forecast

MANILA, Philippines — Nakapagtala ng 5.5% na paglago ng Gross Domestic Product ang bansa sa ikalawang kwarto ng 2019, ayon sa tala ng Philippine Statistics Authority Huwebes.

Ito na ang pinakamababang growth outturn sa loob ng 17 quarters, sabi ni National Economic and Development Authority Secretary Ernesto Pernia sa press conference kaninang umaga.

Tinutukoy ng GDP ang halaga ng lahat ng mga produkto't serbisyo sa loob ng bansa sa isang takdang panahon.

"This weak economic performance during the second quarter of 2019 is the continuing effect of that delay in the passage of the 2019 budget, coupled with the election ban," ayon kay Pernia.

Inasahan na raw ng gobyerno noong 2018 na makaaapekto ang El Niño, protectionism sa mayayamang bansa at election ban sa konstruksyon na makaaapekto sa ekonomiya.

Ang hindi lang daw inasahan ng NEDA ay ang pagkakaipit ng national expenditure program.

Matatandaang 6.2% ang GDP growth ng bansa sa parehong panahon noong 2018 habang 5.6% naman ang naitala noong first quarter.

Mas mababa rin ito kumpara sa 5.9% median GDP growth estimate ng 15 ekonomista para sa ikalawang kwarto.

"This means that we will have to grow by an average of at least 6.4 percent in the second half of the year to reach the low-end full-year growth target of 6.0 to 7.0 percent for 2019," ani Pernia.

Nakaapekto raw ang nakaraang mainit na panahon sa pagbaba ng ani ng palay, na nanamamlay ng 5.5%, at mais, na nag-decline ng 8.4%.

"This is why we must equip the agriculture sector with an effective climate change and disaster risk reduction program that will reduce production losses owing to weather disturbances," sabi pa ng kalihim.

"Importantly, we should ensure the proper implementation of the rice tariffication law."

Nanawagan naman ang NEDA sa Kongreso na gawing prayoridad ang pagpapasa ng TRABAHO Bill, pag-aamyenda ng Foreign Investment Act, Public Service Act at Retail Trade Liberalization Act.

Malaki rin daw ang potential ng turismo para sa pagpapalago ng ekonomiya ng bansa, lalo na't "insulated" naman mula sa trade wars at iba pang tensyon ito.