80% Pinoy kuntento sa pamamahala ng 2019 elections — SWS

MANILA, Philippines — Lumalabas na apat sa limang Pilipino ang "satisfied" o kuntento sa katatapos lang na midterm elections nitong ika-13 ng Mayo, 2019, batay sa pag-aaral na isinagawa ng Social Weather Stations noong ika-22 hanggang ika-26 ng Hunyo.

Ayon din survey na inilabas ng SWS Martes ng gabi, 12% ang hindi kuntento sa pamamahala rito habang 7% naman ang hindi pa nakakapagdesisyon.

Dahil dito, may net satisfaction rating na +68, o "very good" ang 2019 midterm elections, na mas mababa ng limang puntos sa record-high na +73 (excellent) noong 2016 presidential elections.

Samantala, mayorya rin ng mga Pilipino ang sumasang-ayon na naging "independent" at walang kinilingang kandidato o grupo ang Commission on Elections sa 79%.

Malayo ito sa 10% nagsasabing hindi naging independent ang Comelec habang 11% naman ang undecided.

Dahil dito, "extremely strong" (+70) ang nakuhang net agreement ng populasyon sa impartiality ng Comelec ngayong 2019, mas mataas sa +61 noong Hunyo 2013.

'Believability' ng resulta sa Kongreso

Napag-alaman din ng pag-aaral na karamihan ay naniniwalang makatotohanan ang naging resulta ng eleksyon para sa dalawang kapulungan ng Kongreso.

Lumalabas na 86% ang nagsasabing kapani-paniwala ang resulta ng May 2019 elections para sa mga senador.

Kapareho niyan ang piguro noong Hunyo 2013, at anim na puntos na mas mababa sa 92% noong Hunyo 2016.

Nasa 14% lang ang nagsabing "unbelievable" ito.

Mas mataas ang puntos na nakuha ng mga kinatawan ng kamara kung "believability" ang pag-uusapan.

Umani kasi ng 88% ang House of Representatives bilang tugon sa resulta, habang 12% lang ang nagsabing hindi ito kapani-paniwala.

Eleksyon sa LGU

Kamukha ng resulta sa itaas ang pagtingin ng taumbayan sa kinalabasan ng gubernatorial at mayoral race.

Lumalabas na 84% ng mga Pilipino ang naniniwalang credible ang mga nanalo at natalo sa pagkagobernador, kontra sa 8% na umalma.

Mas positibo naman ang mga numero para sa resulta ng pagkaalkalde, na umani ng 89% na believable rating at 11% na unbelievable.

"The proportion of those who consider the Mayoral election results believable has been consistently high since 2004," sabi ng SWS sa kanilang survey.

(Tuloy-tuloy ang pagiging mataas ng believable results para sa mayoral elections simula pa noong 2004).

Ibinatay sa harapang panayam ng 1,200 katao edad 18-anyos pataas ang mga lumabas na datos.

Kumuha ang SWS ng 300 mula sa Metro Manila, Balance Luzon, Visayas at Mindanao.

Meron itong sampling error margin na ±3% para sa national percentages at ±6% para sa national percentages habang ±6% naman pare-pareho para sa Metro Manila, Balance of Luzon, Visayas at Mindanao.