Revilla: Maling pagpaparatang ng 'plunder' bitay dapat ang parusa

MANILA, Philippines — Sinegundahan ni Sen. Ramon "Bong" Revilla ang panawagan ni Pangulong Rodrigo Duterte na maibalik ang parusang kamatayan para sa mga karumal-dumal na krimen matapos ang ika-apat na State of the Nation Address ng presidente kahapon.

"I personally support the president's call to reinstate capital punishment for offenses related to drugs and plunder," sabi ni Revilla sa isang pahayag Martes.

(Personal kong sinusuportahan ang nais ng presidente na maibalik ang capital punishment para sa mga paglabag na may kinalaman sa iligal na droga at pandarambong.)

Pero hindi riyan natapos ang nais ng senador.

Gusto rin kasi niyang maparusahan ang mga mali-maling pagkakaso ng plunder sa mga walang kasalanan.

"Dadagan ko lang na dapat may parusa rin na kamatayan for those who falsely and maliciously accuse other of these offenses (para doon sa mga gumagamit ng kasong ito sa malisiyosong paraan)," dagdag niya.

Disyembre noong 2018 nang iabsweldo ng Sandiganbayan First Division si Revilla sa plunder case kaugnay ng pork barrel scam.

Inakusahan kasi si Revilla ng pagtanggap ng P224.5 milyong "kickback" kapalit ng paglalaan diumano ng kanyang Priority Development Assistance Fund sa mga pekeng non-government organization.

Nais ni Sen. Bong Revilla na parusahan din ng death penalty ang mga indibidwal na mali ang akusasyon kaugnay ng illegal na droga at plunder. pic.twitter.com/iiWTv80K76

— News5 AKSYON (@News5AKSYON) July 23, 2019

Sa 186-pahinang desisyon ng First Division, sinabi nilang direktang walang nalalaman o pagpayag si Revilla tungkol sa krimen kahit na maanomalya ang transaksyon sa mga nabanggit na NGO.

Gayunpaman, ipinasasaoli sa kanya sa National Treasury ang halagang P124.5 milyon.

Muling nanalo sa pagkasenador si Revilla, na isa ring aktor, sa katatapos lang na 2019 midterm elections sa ika-11 pwesto.

"Iba yung pakiramdam. I feel vindicated (Pakiramdam ko napatunayan ko ang sarili). Masaya ako pero nandoon na nagfa-flashback pa din yung mga nangyari na. Lahat ng ito may purpose... why I’m back again (kung bakit ako nakabalik)," sabi niya kahapon sa pagbubukas ng 18th Congress. — may mga ulat mula sa News5 at kay Rosette Adel