Cayetano top choice sa Speakership - survey
MANILA, Philippines — Matapos iendorso ni Pangulong Duterte bilang susunod na House Speaker, lumalabas na si Taguig-Pateros Rep. Alan Peter Cayetano din pala ang pinili ng nakararaming Pilipino para sa posisyon.
Ayon sa mga survey ng Pulse Asia noong Marso 23-27 at Hunyo 24-30, nakuha ni Cayetano ang nasa kalahati ng mga boto sa kanilang mga poll, malayung-malayo sa iba pang matunog din na pangalan sa pagka-Speaker.
Sa survey noong Marso, 44 porsiyento ang bumoto para sa dating Senador. Kasunod niya sa listahan sina dating Bise Presidente Jejomar Binay, 16%; dating Speaker Pantaleon Alvarez, 12%; Rep. Martin Romualdez, 5%; at Rep. Lord Allan Velasco, 1 porsiyento.
Pabor din sa kanyang pagiging House Speaker ang mga Pilipino kung susuriin ayon sa kasarian, edad at pinag-aralan.
Sa survey nitong Hunyo, lumaki pa ang suporta kay Cayetano sa 65 porsiyento ng mga Pilipino. Nasa 52 porsiyento ang lamang niya sa pinakamalapit niyang kalaban, si Alvarez (13%). Nakakuha ng 8% si Romualdez at 6% si Velasco. Ang iba ay nakakuha ng 0.1 percent lamang.
Nanguna rin siya sa Metro Manila (56%), Luzon (68%), Visayas (64%) at Mindanao (65%).
Ang resulta ng mga survey ay nakabase sa panayam sa 1,200 representative adults edad 18 pataas.
Sa larangan ng kakayahan at karanasan, naka-aangat din si Cayetano laban sa iba pang naghahangad maging Speaker.
- Latest
