‘Ang Probinsyano’ binanatan ng PNP, netizens
MANILA, Philippines — Dismayado ang Philippine National Police (PNP) at mga netizen sa isang eksena ng sikat na teleseryeng “Ang Probinsyano” matapos mag-trending sa social media ang “gang rape” sa dalawang unipormadong mga babaeng pulis ng mga miyembro ng criminal syndicate na pinangungunahan ni Bungo (karakter ng aktor na si Baron Geisler).
Sa naturang July 15 episode, buhat ni Bungo ang isa sa apat na policewoman at dinala sa isang tagong lugar na hideout ng sindikato para pagsamantalahan.
Dalawang miyembro ng gang naman ang hawak ang mga kamay ng ibang babaeng pulis habang ang iba ay umaabuso sa mga ito.
“Sobra na po ang pinapakita ninyo sa inyong palabas. Sana po mas maging sensitibo kayo sa inyong mga manonood! Hindi po nakakabuting ipakita ang panggagahasa at pambabastos sa mga babae,” sabi ng isang netizen.
Isa pang babae na tila isa ring pulis sa totoong buhay ay bumatikos sa palabas at nagsabing isa itong paglapastangan sa uniporme ng pulis.
Ilan pang netizen ang nagsasabing sensitibong isyu ang rape para ipakita sa TV show bukod sa nagpapakita ng masamang halimbawa sa mga bata.
Dahil dito, nanganganib na namang magkalamat ang relasyon sa pagitan ng PNP at ng mga opisyal na namamahala sa nasabing sikat na soap opera na pinagbibidahan ng aktor na si Coco Martin.
Sinabi ni PNP acting spokesperson Police Lieutenant Col. Kimberly Molitas na rerepasuhin nila ang nilagdaang Memorandum of Understanding (MOU) sa Production Staff ng “Ang Probinsyano”.
Nakasaad sa MOU sa pagitan ng PNP at ABS-CBN na hindi na sisirain muli ang imahe ng kapulisan sa mata ng publiko.
Idinagdag pa nito na sakaling mapatunayan na may nilabag na naman ang naturang programa ay malaki ang posibilidad na bawiin nila ang kasunduan.
- Latest