Duterte mag-eendorso ng Speaker
Magbabago pa rin ng isip
MANILA, Philippines — Dalawang linggo bago ang kanyang ikaapat na State of the Nation Address, maaaring magbago pa rin ng isip si Pangulong Duterte at sa bandang huli ay mag-eendorso siya ng bagong Speaker ng House of Representatives.
Ito ang sinabi ng ilang mapapanaligang impormante na naglatag ng napipintong senaryo sa Hulyo 22 kapag opisyal nang nagsesyon ang 18th Congress kasunod ng mga pagtatalo hinggil sa mga aspiranteng Speaker na naghati sa mga kaalyado ng naghaharing PDP-Laban.
“Parang nakita niya kung paanong nagkaroon ng pagkakawatak-watak sa plano niyang huwag makialam sa Speakership race na naging free-for-all na labanan at meron pang mga nagsisiraan,” puna ng impormante.
Nitong nagdaang mga araw, ang mga anak ni Duterte na sina Davao City Mayor Sara at Rep. Paolo ay bumuo ng isang koalisyon para pagkaisahin ang nagkawatak-watak na koalisyon ng administrasyon sa mababang kapulungan ng Kongreso at inindorso nila si reelected Davao third district Rep. Isidro Ungab bilang kanilang Speaker.
Kabilang pa sa kumakandidatong Speaker sina Taguig Rep. Alan Peter Cayetano, Marinduque Rep. Lord Allan Velasco at Leyte Rep. Martin Romualdez.
Ayon naman kay Albay Rep. Joey Salceda, makakabuti sa bansa na mag-endorso si Pangulong Duterte ng Speaker dahil tumatagal ang usapin at napakarami ng kandidato na ngayon lang nangyari sa kasaysayan ng post-Marcos Congress.
Pabor din si Capiz Rep. Fredenil Castro na magsalita na ang Pangulo at ihayag ang napipisil nitong Speaker para mawakasan na ang mga ispekulasyon at pagkakahati-hati ng majority coalition.
- Latest