OFW nalaglag mula 3rd floor, patay
MANILA, Philippines — Nasawi ang isang babaeng overseas Filipino worker makaraang mahulog buhat sa ikatlong palapag ng isang apartment building nang tangkain niyang tumakas sa kanyang amo sa bansang Morocco.
Sa pahayag ng Philippine Embassy sa Tripoli, sinabi ni Chargé d’Affaires Elmer Cato na nalagutan ng buhay ang 49-anyos na OFW dahil sa tinamong mga pinsala sa katawan nitong nakaraang Sabado.
Sa ulat, pinagalitan umano ang hindi pinangalanang Pinay worker ng kanyang employer at tinangkang tumakas nang pagdugtong-dugtungin niya ang ilang piraso ng tela na ginamit niya bilang lubid upang makababa sa apartment building sa Casablanca, Morocco.
Minalas na napatid ang tela dahilan para malaglag ang babae na nagresulta sa kanyang kamatayan.
Hawak naman umano ng mga lokal na awtoridad ang employer ng nasawi at isinasailalim na sa imbestigasyon, ayon pa kay Cato.
Nangako naman ang Department of Foreign Affairs ng tulong para maibalik sa Pilipinas ang labi ng nasawing OFW. Isang consular team na ang ipinadala sa Casablanca para makipagtulugan sa mga awtoridad at para maayos ang “repatriation”.
Nagpahayag naman ng pakikiramay ang embahada ng Pilipinas sa Tripoli sa pamilyang naulila ng manggagawang Filipina.
- Latest