Lacson itinangging 'pumupustura para sa 2022' nang mag-ingay kaugnay ng Recto Bank

MANILA, Philippines — Pinabulaanan ni Sen. Panfilo Lacson ang mga ugong-ugong na pumumustura na siya para sa eleksyong 2022, 'yan ay matapos niyang kastiguhin ang mga aksyon ng pamahalaan kaugnay ng insidente sa Recto Bank.

"To those accusing me of posturing for 2022, I am not," sabi niya sa isang tweet Lunes ng umaga.

(Sa mga pinagbibintangan akong pumoposisyon para sa 2022, mali kayo.)

I love Twitter. It makes me think, fact-check, google and learn. As of this hour, I have 22,218 followers; following 374; blocked 448. To those accusing me of posturing for 2022, I am not. I am just myself - mostly serious, sometimes funny, naughty, controversial, dull, boring.

— PING LACSON (@iampinglacson) June 23, 2019

"I am just myself - mostly serious, sometimes funny, naughty, controversial, dull, boring."

(Nagpapakatotoo lang ako - madalas seryoso, minsan nagpapatawa, pilyo, kontrobersyal, nakakayamot.)

Nitong nakaraang linggo, kapansin-pansin ang sunod-sunod niyang maaanghang na pahayag nang pumayag si Pangulong Rodrigo Duterte sa isang joint probe kasama ang Tsina sa banggan sa Recto Bank.

"The Palace wishes to inform our people that President Duterte welcomes and accepts the offer of the Chinese Government to conduct a joint investigation to determine what really transpired in Recto Bank and find a satisfactory closure to this episode," sabi ni presidential spokesperson Salvador Panelo.

(Gustong ipabatid ng Palasyo sa taumbayan na tinatanggap ni Presidente Duterte ang alok ng Tsina na imbestigahang magkasama ang nangyari sa Recto Bank para maresolba ang isyu.)

Matatandaang sinalpok ng Yuemaobinyu 42212 ng Tsina ang F/B Gem-Vir 1 na may lulang 22 Pilipino nitong ika-9 ng Hunyo kahit nasa loob ng exclusive economic zone ng Pilipinas.

Pero hindi naman ito ikinatuwa ni Lacson.

The government must seriously consider the issue of sovereignty in the conduct of a joint investigation with China. The 2016 Hague ruling expressly states that Recto Bank is part of the Philippines’ 200-nautical mile EEZ. It is ours. Are we waiving ownership of Recto Bank?

— PING LACSON (@iampinglacson) June 23, 2019

Dagdag pa niya, tila si Foreign Affairs Secretary Teodoro Locsin lang daw ang nag-iisip nang tumanggi siyang husgahan ng Tsina ang sariling kaso.

"The others, Panelo, Nograles, Piñol, I'm not sure," sabi niya.

(Yung iba, si Panelo, Nograles, Piñol, hindi ako sigurado.)

Ngayong umaga, sinabi rin ni dating Foreign Affairs Secrertary Albert del Rosario sa panayam ng ANC na dapat ibasura ng Pilipinas ang joint investigation kasama ang Tsina dahil papabor daw ang resulta sa kanila.

Noong isang linggo, matatandaang sinabi ni Panelo na "illogical" ang sinabi ni Lacson na nag-aabogado siya para sa Tsina.

Iminumungkahi ngayon ni Duterte na lumikha ng isang joint investigating committee para imbestigahan ang insidente, na lalahukan ng Pilipinas, Tsina at isa pang "neutral country."