Toilet paper, sabon, flush sa CR ng mga terminal nasa batas na – Poe
MANILA, Philippines — Ipinaalala kahapon ni Sen. Grace Poe na obligado na ang mga kompanya ng bus na tiyaking malinis ang kanilang mga comfort rooms at mayroon dapat itong toilet paper, sabon, tubig naka-flush na toilet at maayos na ilaw.
Ginawa ni Poe ang paalala tungkol sa nilagdaang batas ni Pangulong Duterte na Better Terminals Law na pangunahing isinulong ni Poe sa Senado.
Ayon kay Poe, sakop ng batas ang lahat ng mga land transport stops kung saan kasama ang mga bus, jeepney at mga roll-on/roll-off terminals.
Dapat din aniyang nakahiwalay ang palikuran para sa mga kababaihan at mga lalaki at mayroon din para sa mga disabled.
Nakalagay din sa batas na dapat ay may breastfeeding room para sa mga nanay at mayroon ding wi-fi.
Naniniwala si Poe na ikatutuwa ng mga manlalakbay ang nasabing batas dahil matitiyak na ang paggamit nila ng malinis na palikuran.
Mahalaga ang nasabing batas lalo pa’t isinusulong ng gobyerno ang maayos na turismo.
Naniniwala rin si Poe na maliit na bagay lamang ang paglalagay ng maayos na palikuran kumpara sa malaking kinikita ng mga kompanya ng bus.
- Latest