‘Ipapalulon ko sa’yo pustiso mo’
Banta ni Duterte sa Kapa leader
MANILA, Philippines — Binantaan ni Pangulong Duterte ang founder ng Kapa Community Ministry International Inc. na si Pastor Joel Apolinario na pupuwersahin niyang lulunin nito ang pustiso nito dahil sa patuloy na panghihikayat sa mga mamamayan na ipuhunan ang kanilang pera sa “get rich” scheme na nangangako ng malaking tubo.
Binalaan ng Pangulo si Apolinario laban sa pangangalap ng mga puhunan at tinawag niya itong “fool” at “swindler.”
Kasabay nito, sa kanyang talumpati sa Lagao Gym sa General Santos City para sa pamamahagi ng mga certificate of land ownership, nagbabala si Duterte kay Apolinario at sa ibang nasa likod ng patuloy na operasyon ng Kapa Ministry International na aarestuhin sila at hindi papayagang magpiyansa dahil ang kaso nila ay large scale estafa at swindling.
“Makinig kayo sa akin. Abogado ako at ako ang inyong Presidente. Huwag pumasok sa Kapa. Huwag magalit. Kung mukha siyang napakaganda, maaaring panloloko iyan,” sabi pa ni Duterte. “I’m sorry. Dapat mahinto ang operasyon (ng Kapa). Isa iyang patuloy na krimen.”
Nitong nagdaang linggo, sinalakay ng mga awtoridad ang ilang satellite office ng Kapa sa iba’t-ibang bahagi ng bansa makaraang iutos ng Pangulo na ipatigil ang operasyon nito dahil isa itong malawakang pandaraya at isang Ponzi investment scheme na bumibiktima sa mga investor na pinapangakuan ng limang ulit na doble sa kanilang pera.
Binalaan din ng Pangulo ang mga agrarian beneficiaries na huwag subukang ibenta o isangla ang titulo ng lupa dahil kapag nagkataon, ipatatawag niya at sila’y papipilahin para pagsusuntukin, babae man o lalake.
- Latest