Driver’s license renewal pwede na sa malls tuwing Sabado - LTO

MANILA, Philippines — Maaari nang makakuha ng student permit at makapag-renew ng kanilang driver’s license ang mga motorista tuwing araw ng Sabado sa mga mall.

Ito’y makaraang magpalabas ng memorandum circular si LTO Chief Edgar Galvante na nag-uutos sa lahat ng Driver’s License Renewal Offices (DLRO) sa mga malls sa buong bansa na buksan ang kanilang mga opisina para mabigyan ng serbisyo ang mga nais kumuha ng student license at makapag-renew ng kanilang lisensiya ang mga aplikante tuwing Sabado.

Epektibo ang kautusan ngayong June 2019.

Una nang inutos ni Galvante na payagan na ring makapag-renew ng kanilang lisensiya ang mga driver ng may 2 buwan o 60 araw bago ang itinakdang renewal date ng aplikante.

Kung ayaw naman ng hassle sa pagkuha ng lisensiya, ang sinumang aplikante ay maaaring makipag-appointment sa online sa pamamagitan ng LTO Online Appointment and Scheduling System  sa pamamagitan ng pag-log on sa www.lto.net.ph.