DA Chief Piñol inabswelto sa corruption
MANILA, Philippines — Abswelto sa bintang na corruption si Agriculture Sec. Manny Piñol makaraang maglabas ng clearance ang Presidential Anti-Corruption Commission (PACC) na naglilinis sa pangalan nito sa bintang na unexplained wealth.
Sinabi ng PACC, dumaan sa 7 buwang lifestyle check si Piñol at walang nakita ang komisyon na mayroon itong hindi maipaliwanag na kayamanan.
Ayon kay PACC Chairman Dante Jimenez, boluntaryo ring sumailalim sa lifestyle check ang kalihim matapos pagbintangang nakinabang sa mga transaksiyon sa kanyang tanggapan.
Ang lifestyle check kay Piñol ay sinimulan noong Nobyembre 2018 sa tulong ng Anti-Money Laundering Council (AMLAC), National Bureau of Investigation (NBI), Land Transportation Office (LTO), Land Registration Authority (LRA) at iba pang partner na ahensiya ng komisyon.
Pinuri din ng PACC si Piñol dahil sa halip na mag-ingay at idepensa ang sarili sa media kaugnay sa bintang na katiwalian, boluntaryo nitong binuksan ang kanyang bank records at financial documents sa mga imbestigador.
Nakatakda nilang isumite kay Pangulong Duterte ang resolusyon na naglilinis sa pangalan ni Piñol sa anumang pananagutan kaugnay sa bintang na katiwalian.
- Latest
