P4.2-T budget panukala sa 2020
MANILA, Philippines — Aabot sa P4.2 trilyon ang panukalang national budget para sa 2020 na isusumite ng Department of Budget and Management (DBM) sa darating na 18th Congress sa mismong araw ng ikaapat na State of the Nation Address (SONA) ni Pangulong Rodrigo Duterte sa joint session ng Senado at Kamara sa Hulyo 22.
Sinabi ni Budget officer-in-charge Janet Abuel na ang susunod na national budget ay magiging cash-based.
“Itinutulak namin ang cash budgeting pero pinag-aaralan namin ang transisyon.
Tignan natin ang mangyayari sa 2019, pagkatapos, tignan natin kung kailangan ng hinay-hinay na hakbang sa pagtatangkang ganap itong mapagtibay,” sabi ng hepe ng DBM.
Idinagdag pa ni Abuel, ang magiging prayoridad sa 2020 national budget ay ang infrastructure, anti-poverty program at pro-employment spending sa pamamagitan ng strategic infrastructure projects, universal health care at ang Bangsamoro autonomy.
“Batay sa veto message ng Pangulo para sa 2019 GAA [General Appropriations Act], nilinaw niya na, dahil sa naantalang pagkakapasa (ng badyet) at sa election ban, napagtanto namin na mahirap na ganap na ipatupad ang cash budgeting system na kakailanganin ng lahat ng mga ahensiya ng pamahalaan na magbayad sa loob ng taon,” paliwanag ni Abuel.
- Latest