27 pulitiko sa 'narco-list' wagi sa midterm elections — PNP

MANILA, Philippines — Kinumpirma ni Philippine National Police chief Oscar Albayalde na aabot sa 27 pulitiko na iniuugnay sa kalakalan ng droga ang nanalo sa katatapos lang na midterm elections noong ika-13 ng Mayo.

Sa isang press conference Lunes ng umaga, sinabi ni Albayalde na 37 sa 47 na nasa nasa kontrobersyal na listahan ng Pangulong Rodrigo Duterte ang tumakbo.

Ang tala ay parte pa rin ng "gera kontra droga" ng administrasyon.

Dagdag pa ng hepe, kabilang sa mga nanalo ay nasa Central Luzon at Calabarzon.

"['P]ag merong nakitang mga ebidensya laban sa kanila, they'll be filed cases," sambit ni Albayalde.

Ilan sa mga nabanggit ay nakasungkit daw ng mga pwesto sa pagka-alkalde at pagka-gubernador.

Hindi naman nilinaw ng PNP kung pormal nang kinasuhan ang mga pulitiko dahil hindi raw sila ang may hawak ng mga reklamo sa kanila.

"Sa ngayon I really can't say kasi DILG (Department of the Interior and Local Government) ang nagha-handle ng kaso nila, not the Philippine National Police," dagdag niya.

Dati nang umani ng batikos ang Palasyo sa paglalabas ng listahan dahil maaari raw itong magamit para maging "sunud-sunuran" sa Malacañang ang mga noo'y kandidato.

"If they have adequate evidence then they should go to court and file a case, not dangle this supposed narco list so that politicians would obey their whim in fear of being added to the list," sabi ni Bayan Muna Chairperson Neri Colmenares.

(Kung may sapat silang ebidensya eh 'di maghain sila ng kaso sa korte, hindi 'yung maglilitaw sila ng narco-list para sumunod ang mga pulitika sa mga kapritso nila sa takot na maidagdag dito.)

Matatandaang sinabi ni presidential spokesperson Salvador Panelo na "isinuko" na raw ng mga nabanggit na pulitiko ang karapatan maipagpalagay na inosente sa kanilang pagkakaugnay sa droga.

"You know rights under the Constitution can be weighed. Those involved in drugs, have, in my mind, waived the right to such right of being given the presumption of innocence. Why? Because they know they are involved there. They run for public office and it’s fair game. You open yourself to criticism as well as exposure of your involvement to anything illegal," sabi ni Panelo.

(Alam mo naman na pwedeng timbangin ang mga karapatan sa Saligang Batas. Ang mga may kinalaman sa droga, sa aking palagay, isinuko na nila ang karapatan nila na maipagpalagay na inosente. Bakit? Kasi alam nilang may kinalaman sila. Talo-talo na 'yan kung tatakbo sila sa posisyon. Ibinubukas mo ang sarili sa kritisismo pagdating sa mga kaugnayan mo sa mga gawing iligal.)

Sinabi ito ng Palasyo kahit na nakasaad sa Article III, Sec. 14 (2) ng 1987 Constitution na ituturing na inosente ang lahat ng akusado hanggang mapatunayang nagkasala.

"In all criminal prosecutions, the accused shall be presumed innocent until the contrary is proved, and shall enjoy the right to be heard by himself and counsel, to be informed of the nature and cause of the accusation against him, to have a speedy, impartial, and public trial, to meet the witnesses face to face, and to have compulsory process to secure the attendance of witnesses and the production of evidence in his behalf..."