‘Big One’ paghandaan, Yolanda Part 2 iwasan - Tolentino
MANILA, Philippines — “Ang pagmamalasakit sa mundo ay pagkalinga sa Pilipino.”
Ito ang dapat gawing gabay ng mga taong gobyerno sa pagdiriwang ng Earth Day, ayon sa pambatong senatoriable ng administrasyon na si Francis Tolentino dahil isa umano itong taunang paalala sa pangangailangang pangalagaan ang kalikasan at pagsagawa ng mga hakbang upang ihanda ang mamamayan sa masamang epekto ng nagbabagong panahon.
Ayon kay Tolentino, na pangunahing naatasan ni Pangulong Duterte na tugunan noon ang mapanirang epekto ng Bagyong Ompong, pinagtibay umano ng kanyang karanasan bilang dating alkalde at MMDA Chairman ang paniniwala na kailangang magbuo ng isang ahensyang mangunguna sa pag-uugnay ng mga hakbang sa disaster preparedness, dahil iilan lang sa mga lokal na pamahalaan ang may kakakayahang tumugon sa banta ng kalamidad.
“Dapat matuto na tayo sa problema dati. Batid na natin ang kahahantungan kapag bigong ihanda ang mga bayan: libu-libong buhay ang nalalagas, bilyun-bilyong piso ang pinsala. Tanging ang isang department of disaster resiliency ang iiwas sa atin sa Yolanda Part 2, o sa Big One,” giit ni Tolentino.
Pumasa na sa Kamara ang panukalang Department of Disaster Resilience (DDR) na mangangasiwa sa mga gawain tungo sa pag-iwas, pagpapababa ng pinsala, pagtugon, at pagbangon tuwing may sakuna.
Umaasa si Tolentino na tatatapatan ito ng Senado ng sarili nitong bersyon sa papasok na Kongreso.
“Kung hindi umabot, ang pagpapasa ng batas na ito ang magiging unang priority ko kung pagpapalain akong makapasok sa Senado.”
- Latest