Duterte gusto na uling makipag-usap sa NDFP

MANILA, Philippines — Matapos sabihing isinasara na niya ang usapang pangkapayapaan sa pagitan ng pamahalaan at National Democratic Front of the Philippines, sinabi ni Pangulong Rodrigo Duterte na gusto niyang gumawa ng panibagong peace panel na haharap sa mga rebelde.

Sa pagkakataong ito, sinabi ni Digong na gusto niyang buuin ng 'di bababa sa dalawang sibilyan at tatlong militar ang panibagong panel.

Inilatag ng presidente ang kanyang plano sa campaign rally ng Partido ng Demokratikong Pilipino-Lakas ng Baya sa Malaybalay City, Bukidnon noong isang araw.

"If you've noticed, the president's always made himself open to any talks on peace. Ever since, sinasabi niya 'yon. 'Di ba laging sinasabi niya, 'Lagyan natin ng konting window,'" wika ni presidential spokesperson Salvador Panelo sa isang press briefing, Lunes.

Pero paglilinaw ni Panelo, tuloy pa rin ang localized peace talks ng pamahalaan sa kabila ng pahayag ni Duterte.

"Eh wala pa naman eh. Sinabi pa lang niya 'yon. Wala pa siyang kine-create. It's still an idea," sabi ng tagapagsalita.

Binuo ang localized peace talks matapos lusawin ni Duterte ang appointment ng mga miyembro ng Government of the Republic of the Philippines Negotiating Panel, ika-18 ng Marso.

Ayon sa isang ulat ng Philippine News Agency, sinusundan ng nasabing kaayusan ang "Colombian model" kung saan lumalahok ang mga sectoral groups, local government units at militar sa panel ng localized talks.

Ibinalangkas daw ito sa pambansang antas alinsunod sa ipinatutupad na "whole-of-nation" approach.

War panel?

Gayunpaman, sinabi ni Communist Party of the Philippines founder at NDFP chief political consultant Jose Maria Sison na hindi peace panel ang bubuuin ni Duterte ngunit "war panel."

Sa inilabas na pahayag ni Sison nitong Linggo, pinag-iingat ni Sison ang taumbayan sa bubuuing "militarized" negotiating panel sa ilalim ni Presidential Peace Adviser Carlito Galvez Jr.

Si Galvez ay isang retiradong heneral ng AFP.

"The NDFP does not want to be baited into accepting a war panel of the Duterte regime whose purpose is merely to seek the impossible, such as the surrender of the revolutionary forces, especially the New People’s Army," sabi ni Sison.

Aniya, kakailanganin munang sagutin ni Duterte kung bakit niya tinapos ang peace negotiations, maging ang lahat ng kasunduan na nilikha mula Hague Joint Declaration noong 1992.

Maliban din siya pinagpapaliwanag din ang chief executive kung bakit niya nilusaw ang GRP section ng Joint Monitoring Committee na binuo ng Comprehensive Agreement on Respect for Humans Rights and International Humanitarian Law.

"The NDFP must remind Duterte that he cannot dictate the terms of whatever kind of negotiations he seeks from the revolutionary movement pf the people," dagdag ni Sison.

"By all indications, Duterte is merely play-acting in the name of peace while carrying out an all-out war and scheming to rig the May 2019 elections in order to pave the way for a fascist dictatorship through charter change to a bogus federalism."

'Huwag pansinin si Sison'

Sa kabila ng statement ni Joma, sinabi ni Panelo na wala siyang pakialam kung anuman ang palagay ni Sison sa bagong arrangement.

"It doesn't matter whether he likes it or not," sabi ni Panelo.

Aniya, iiitsapwera nila sa panibagong pag-uusap si Sison at kauusapin na lang ang mga hindi nakikinig sa CPP founder.

Wala naman na raw kasi siyang impluwensya sa mga miyembro ng CPP.

"From the way the ground forces are doing their thing, it appears to me that way... [W]e will ignore him," ani Panelo.