Michael Yang pinaiimbestigahan sa Senado
MANILA, Philippines — Naghain ng isang resolusyon si Sen. Leila de Lima upang paimbestigahan sa Senado ang diumano’y kaugnayan ni dating presidential economic adviser Michael Yang sa illegal drug trade sa bansa.
Sa Senate Resolution 1033 ni de Lima, sinabi nito na dapat lamang na busisiing mabuti ng Senado kung inabuso ni Yang ang kanyang posisyon bilang economic adviser ng Pangulo at kung totoo ang pagkakasangkot niya sa droga.
Ipinahiwatig din ni de Lima na dapat tingnan ang posibleng deportasyon ni Yang bilang isang “undesirable alien” kung mapapatunayang sangkot ito sa illegal drug trade.
Pero dapat din aniyang sampahan ito ng kaukulang kaso kung totoo ang akusasyon laban sa kanya.
Base sa mga news report, si Yang na ang Chinese name ay Yang Hong Ming, ay nagsilbi bilang economic adviser ng Pangulo simula Enero hanggang Disyembre 2018 base na rin sa mga ipinamamahagi niyang business cards na may official seal ng Office of the President.
Kamakailan ay pinangalanan si Yang ni dating police officer Eduardo Acierto na sangkot umano sa iligal na droga kasama ang kanyang mga business partners na sina Allan Lim at Johnson Chua na mga nakabase sa Macau.
- Latest
