17 pang NDF consultant susunod na aarestuhin
MANILA, Philippines — Labingpito pang consultant ng National Democratic Front ang susunod nang aarestuhin ng security forces matapos namang tuldukan na ni Pangulong Rodrigo Duterte ang usapang pakikipagkapayapaan sa Communist Party of the Philippines-New People’s Army-NDF.
Ayon kay Major General Rhoderick Parayno, Commander ng 2nd Infantry Division ng Philippine Army, 23 NDF consultants ang naunang nabigyan ng safe conduct pass ng pamahalaan.
Sa nasabing bilang ay anim na ang magkakasunod na nasakote ng security forces at nasa 17 pa ang patuloy nilang pinaghahanap.
Idiniin ng opisyal na dahil tinapos na ni Pangulong Duterte ang peace talks sa hanay ng komunistang grupo ay wala nang bisa ang safe conduct pass ng nasabing mga NDF Consultants.
Pinakahuli sa mga nasakote ay ang dating pari na naging top NPA terrorist at NDF consultant na si Frank Fernandez alyas Ka Ago ng NPA Komiteng Rehiyon Negros na nabitag sa raid sa safehouse ng mga ito sa Brgy. Calumpang sa pagitan ng hangganan ng mga bayan ng Liliw at Nagcarlan, Laguna.
Samantala, nilinaw kahapon ng Diocese ng Imus na walang kaugnayan at hindi naging bahagi ng diyosis ang retiradong pari na inaresto at inakusahang kaanib ng NDFP.
Ayon kay Imus, Cavite Bishop Reynaldo Evangelista, walang koneksyon sa kanilang diyosesis si retired Fr. Arturo Balagat dahil matagal itong nag-serbisyo sa Diocese ng San Bernardino, California.
Sinabi pa ng chairman ng Catholic Bishops Conference of the Philippines (CBCP) Permanent Committee on Public Affairs na bumalik lang si Balagat sa Cavite nang mag-retiro na ito.
Inamin naman ni Pangulong Duterte na sumuko na siyang makipagnegosasyon pa sa CPP-NPA-NDF.
Ito ang pagpapaliwanag ni Pangulong Duterte sa harap ng libu-libong political supporters ng PDP-Laban habang nagsagawa ng rally sa isang university gym sa Barangay Lapasan, Cagayan de Oro City kamakalawa ng gabi.
Sinabi ni Duterte na pinutol na niya nang tuluyan ang negosasyon sa pamamagitan ng pagbuwag sa government peace panel dahil walang mararating ang negosasyon sapagkat hindi sinsero ang kabilang panig.
- Latest