Senado at Kamara mag-uusap sa Lunes

MANILA, Philippines — Nakatakdang mag-usap sa Lunes ang Senado at House of Representatives tungkol sa panukalang 2019 national budget.

Ayon kay Senate President Vicente “Tito” Sotto III, makikipag-usap sa panig ng Senado si Senator Loren Legarda, chairman ng finance committee, kasama sina Senators Panfilo Lacson at Gregorio Honasan II.

Umaasa si Sotto na magkakaroon ng magandang pangyayari sa gagawing pag-uusap para maipasa na ang P3.7 trilyon panukalang budget.

Sinabi ni Sotto na wala naman siyang partikular na utos sa contingent ng Senado lalo pa’t alam niyang ipaglalaban ng tatlong senador kung ano ang naaprubahan at niratipikahan.

Ngpahayag din ng pag-asa si Sotto na madadala na sa Malacañang ang kopya ng enrolled bill para malagdaan ng Pangulo.