Outbreak ng sakit sa kulungan binabantayan

MANILA, Philippines — Pinamomonitor ng Department of Health (DOH) ang posibleng outbreak ng iba’t ibang sakit sa mga kulungan sa bansa bunsod ng kakulangan sa tubig.

Ayon kay Health Secretary Francisco Duque, posibleng magkaroon ng sakit na dermatitis at iba pang sakit sa balat ang mga preso kung hindi malinis ang mga piitan.

Aniya, kailangang laging handa at alerto ang National Capital Region office at Epidemiology Bureau upang agad na maagapan ang posibleng pagkalat ng sakit.

Kadalasang nangyayari na siksikan ang mga piitan tuwing summer at nagkakaroon ang mga ito ng pigsa, hika, galis at bungang araw.

Posible umanong lumala ang mga ito kung walang sapat na supply ng tubig para mapanatili ang kalinisan.

Nakikipag-ugnayan na rin ang DOH sa Bureau of Jail Management and Penology upang maiwasan ang pagkahawa ng mga preso. (Doris Franche)