‘Senatorial debate malabo na’ - Comelec
MANILA, Philippines — Malabo nang makapag-organisa ang Commission on Elections ng public debate ng maka-administrasyong Hugpong ng Pagbabago at ng maka-oposisyong Otso Diretso.
Noong nakaraang linggo, hiniling nina Rep. Gary Alejano (Magdalo party-list), Marawi civic leader Samira Gutoc at lawyers Romulo Macalintal at Florin Hilbay sa Comelec na magtakda ng debate ng kanilang grupo at ng senatorial ticket ng HNP.
Pero sinabi ni Comelec Chair Sheriff Abas na wala nang oras ang komisyon para mag-organisa ng isang debate.
“So far, ang problema natin oras. Wala na kaming oras for an official debate,” sabi ni Abas sa isang panayam kahapon.
Pero sinabi ni Abas na tatalakayin bukas ng Comelec en banc ang debate na hinihiling ng mga kandidato ng oposisyon.
Sinabi pa niya na magiging mahirap magsagawa ng isang debate para sa lahat ng 62 kandidato para sa puwesto sa Senado.
Hindi ito anya tulad sa halalang pampanguluhan na kakaunti lang ang mga kandidato. “Eh ito nasa 62. Even the platform, system of debate, nahirapan din ang mga [television] network. Mahirap siya buuin for a midterm elections,” paliwanag pa niya.
Gayunman, sinabi ni Abas na susuportahan niya ang mga debate na inoorganisa ng mga television network.
- Latest