Plane crash: 2 piloto sugatan
MANILA, Philippines — Bagama’t nasugatan, himalang nakaligtas ang isang babaeng student pilot at ang kanyang guro matapos na mag-crash landing ang kanilang sinasakyang 2-seater training plane sa taniman ng palay sa Barangay Homestead 2, Talavera, Nueva Ecija, kahapon ng umaga.
Kinilala ng pulisya ang dalawang sakay ng bumagsak na Cesna 172 plane, na may body number RP-C2847 na sina Maria Thalia Zeph Limpin, 22, dalaga, mag-aaral ng Fast Aviation Academy (FAA) sa Lingayen Pangasinan at residente ng Barangay Bayan Luma 5, Cavite City; at si Boni Sorgon, 31, may-asawa, flight instructor ng FAA, at nakatira sa Barangay Libsong West, Lingayen, Pangasinan.
Ayon kay P/Supt. Alexie A. Desamito, hepe ng pulisya rito, lumalabas na nagkaroon ng engine failure ang eroplano sanhi upang bumagsak ito sa nasabing palayan bandang alas-7:35 ng Lunes ng umaga.
Isinugod ng mga rumespondeng pulis sa Talavera General Hospital ang dalawang biktima.
- Latest