Malacañang ikinatuwa na kumonti na ang mga adik

MANILA, Philippines — Ikinagalak ng Malacañang ang resulta ng pinakahuling survey ng Social Weather Station (SWS) na nagsasabing 6 sa 10 Filipino o 66% ang naniniwalang nabawasan ang bilang ng mga drug addict sa kanilang lugar.

Sinabi ni Presidential Spokesman Salvador Panelo, ang resulta ng survey ay nagpapatunay na tagumpay umano ang kampanya ng Duterte administration laban sa iligal na droga.

Ayon kay Panelo, ang anti-drug war  ay major campaign platfrom ni Pangulong Duterte at nananati­ling isang “centerpiece program” ng administrasyon sa kabila ng kaliwa’t kanang batikos.

“They (political opposition) remain skeptical, unimpressed and indifferent,” sabi ni Panelo.

Mismong ang mga mamamayan na anya ang nagsabi na nabawasan ang mga gumagamit ng iligal na droga.

Kaugnay nito, hinikayat ni Panelo ang mga taga-oposisyon at kritiko na tumigil na sa pagiging bulag, bagkus makinig na lamang sa sinasabi ng taongbayan na bumaba ang bilang ng mga nalululong sa iligal na droga sa iba’t ibang bahagi ng bansa.

Tiniyak din ni Panelo na magtutuloy-tuloy ang kampanya laban sa iligal na droga hanggang sa hu­ling termino ng Pa­ngulo sa 2022.