Tigdas outbreak hanggang Marso pa
MANILA, Philippines — Posibleng tumagal pa hanggang Marso ang measles outbreak sa bansa.
Ayon kay Health Undersecretary Eric Domingo, ito’y bunsod na rin ng patuloy na pagdami ng kaso ng tigdas sa bansa kaya hindi pa maidedeklarang “under control” ang measles outbreak.
Gayunman, target aniya nilang mabakanuhan ang lahat ng batang hindi pa nababakunahan kontra tigdas, beke at rubella o German measles upang hindi na umano lumala pa ang sitwasyon.
Batay sa tala ng DOH noong Lunes, may 70 katao na ang naiulat na nasawi dahil sa tigdas habang pumalo na sa 4,300 ang naitalang kaso ng tigdas sa bansa mula Enero.
Apela ng DOH, mas makabubuti na pabakunahan ng mga magulang ang kanilang mga sanggol upang mas makaiwas pa sa anumang paglala ng sakit o komplikasyon.
Hindi aniya dapat na katakutan ang bakuna dahil lamang sa maling impormasyon.
- Latest