Pekeng rabies vaccine na naiturok sa mga pasyente gawang 'Pinas

MANILA, Philippines — Kinumpirma ng Food and Drug Administration na gawa sa Pilipinas ang ilang "counterfeit" at 'di rehistradong bakuna kontra-rabis na nagamit sa isang ospital sa bansa.

Una ng inireklamo sa FDA ng The Medical City—Pasig ang mga naturang gamot na kilala sa pangalang Verorab vaccine. Aminado ang ospital na naiturok na nila ito sa ilang pasyente.

"Nagsubmit po sila [Medical City] ng mga samples nitong mga produktong pinaghihinalaan nilang counterfeit. Nakipagsangguni rin po kami sa market authorization holder para i-verify kung talagang counterfeit po ang mga products na ito," paliwanag ni Atty. Michelle Lapuz, director ng legal support service center ng FDA, sa panayam ng DZMM.

"Kinonfirm po, cinertify po ng Center for Drug na talagang counterfeit ang mga samples na ito."

Ayon sa imbestigasyon, lumalabas na sa Pilipinas nililikha ang mga naturang gamot para sa kagat ng hayop. Gayunpaman, ayaw pa nilang pangalanan ang manufacturer at distributor.

"Dito po sa aming operations and investigation, ang source po is talagang dito sa Philippines. 'Yan po ang tinutumbok ng aming investigation ngayon and operations," ani Lapuz.

Health risks

Napag-alaman ng kanilang imbestigasyon na natanggal na sa tatlo sa 42 ospital ang produkto, pero naibigay na ito sa ilan.

"Unfortunately, dalawa po out of the 42 ay nakapag-administer na ng mga produktong tinutukoy natin," sabi ni Lapuz.

Babala ng FDA, maraming masamang epekto na pwedeng makuha mula sa pagtuturok ng 'di lehitimong gamot.

"[A]kala natin nakakagamot, hindi pala. Akala ng doktor wala kang reaction doon sa ibinakuna sa'yo, bibigyan ka nang mas matinding dose. Doon palang, wala namang effective ingredient 'yon. Doon pa lang, nagbui-build ka na ng resistance," banggit niya.

Meron din daw harmful ingredients ang ilang counterfeit drugs na posibleng magkaroon ng reaksyon sa mga lehitimong gamot na tinatanggap ng mga pasyente.

Naglabas na rin ng FDA advisory tungkol rito sa Verorab vaccine na may batch no. H1833.

Ginagawan na raw nila ng paraan upang tuluyang matigil ang pagpapamahagi nito.

Haharap naman sa mga kasong administratibo at kriminal ang mga sangkot dito.

Dagdag niya, pawang mga lisensyadong establisyamento at importers lang ang maaaring magpasok ng mga gamot sa bansa. 

"Bukod po doon sa fines and penalties, talagang meron po itong pagkakulong lalo na kung mapatutunayan na nagkaroon ng negligence... at intention na ilabas sa publiko itong counterfiet products na ito."

Nakikipagtulungan na rin daw sila sa mga lokal na gobyerno para matukoy kung saan pa ito naipamigay at kung sino ang pinanggalingan.

Para sa mga nababahala kung ligtas ang gamot na kanilang gagamitin, maaari raw iberipika mula sa website ng FDA ang pangalan nito kung rehistrado.