Sesyon magpapatuloy ngayong araw; Budget prayoridad

MANILA, Philippines — Magiging prayoridad ng Kongreso ang pagpasa ng P3.75-trilyong pambansang budget para sa 2019 sa pagpapatuloy ng sesyon ngayong araw.

Determinado raw ang Kamara na maipapasa na ito ayon kay House Speaker Gloria Macapagal Arroyo. Aniya, nagawa na ng House of Representatives ang parte nito at kailangan nang kumilos ng Senado.

“Kinakausap naman namin sila [mga senador], pero hinahayaan lang namin sila sa sarili nilang timetable. 'Di namin sila pagagalitan. We cannot nag them on passing any of our measures,” sabi ng dating presidente sa Ingles.

Sinegundahan naman ni House deputy speaker at Batangas Rep. Raneo Abu ang pagpapasa nito.

“Masigasig ang pamunuan ng Kamara na maipasa ang 2019 annual budget dahil maraming programa at proyekto ang gobyerno na natatali o naaantala dahil sa 'di naipasa ang bagong budget,” sabi ni Abu.

Ayon sa kanya, naaapektuhan nito ang pagpapatuloy ng P1.104 bilyon Batangas City–Bauan Bypass Road na magpapaluwag sa masikip na daloy ng mga sasakyan sa Batangas City-Palico Highway.

Parangal kay Batocabe

Maglulunsad din ng necrological sevice ang Kamara ngayong araw bilang pag-alala kay Ako Bicol Rep. Rodel Batocabe na pinaslang noong ika-22 ng Disyembre.

Sasaksahin din ng asawa ni Batocabe na si Gertie, at mga anak na sina Jhustine at Khiel, ang parangal na ihahandog ng mga mambabatas.

“We celebrate his memory as an unyielding advocate of eradicating poverty through affordable quality education. He was also a proponent of legislative efforts to mitigate the occurrence of hazing and bullying in schools,” ayon sa imbitasyon sa event.

“A lawyer by profession, he took a firm stand in promoting social justice, women empowerment, environmental protection, renewable energy and universal access to health and education,” dagdag nito.

Pamumunuan ni Kabayan party-list Rep. Paul Hernandez ang invocation pagkatapos ng misa.

Magbibigay naman ng eulogy sina retired Supreme Court justice Vicente Mendoza at Presbitero Velasco Jr., kasama nina Arroyo, House Minority Leader Danilo Suarez, at Deputy Speaker Sharon Garin.