Pulis na iinom ng alak sa club, sisibakin
MANILA, Philippines — Kakasuhan hanggang sa tuluyang sibakin sa serbisyo ang sino mang pulis na mahuhuling umiinom ng alak sa bars, nightclubs, at pampublikong lugar sa bansa.
Ayon kay DILG Sec. Eduardo Año, inatasan na niya si PNP Chief Gen. Oscar Albayalde na magpalabas ng administrative order hinggil sa nasabing kautusan.
“Si Presidente na mismo ang nagsabi na bawal na uminom ang mga police sa mga bar, pub at mga kalsada. Kasuhan ninyo agad ang sinumang lalabag dito,” anang Kalihim.
Ayon kay Año, tama ang Pangulo na dapat na umakto ng maayos ang mga pulis upang makuha ang tiwala at respeto ng mga mamamayan.
Ang mga pulis na mahuhuling umiinom sa mga pampublikong lugar ay mahaharap sa kasong administratibo gaya ng dereliction of duty, insubordination at gross neglect of duty hanggang sa tuluyang masibak sa serbisyo.
- Latest