DBM itinangging may 'flood control scam'

MANILA, Philippines — Itinanggi ng Department of Budget and Management (DBM) na may anomalya para sa mga proyektong gagawin para ibsan ang mga pagbaha.

Sa inilabas na pahayag ng DBM, tinawag na iresponsable at "misleading" ang paggamit ng mga datos na inilathala sa pagdinig ni House Committee on Rules, Committee Chairperson at House Majority Leader Rolando Andaya Jr. Hindi pa raw kasi maaaring gamiting ebidensya ang panukalang budget para sa fiscal year ng 2019.

"There are no existing projects for 2019 as the 2019 budget has yet to be legislated, much less implemented," ayon sa DBM.

Magpapatupad ng "re-enacted budget" simula ngayong Enero hangga't hindi pa ito naipapasa matapos hindi maaprubahan ang P3.757 trillion panukalang national budget dahil diumano sa kakulangan ng oras. 

Sinabi kasi ni Andaya na may P332 bilyong perang inilaan para sa mga kahina-hinalang flood control projects. Binubuo raw ito ng P213 bilyong alokasyon para sa taong 2017 at 2018, at P199 bilyon para sa 2019.

Dagdag pa ng departamento, hindi totoong may mga pinapaboran silang distrito na bibigyan ng pondo dahil hindi nila trabaho ang pagpili ng mga proyektong ipatutupad. Ini-uugnay kasi ni Andaya ang pagkakaroon ng malaking budget ng Casiguran, Sorosogon para sa flood control projects, isang bayan na pinamumunuan ni Mayor Edwin Hamor.

"The DBM has no hand in determining the projects that should be implemented and in which areas or districts. This is the job of the implementing agency; in this case, the DPWH," ayon sa pahayag.

Kamag-anak ni budget Sec. Benjamin Diokno si Hamor dahil sa asawang si Sorsogon Vice Gov. Esther Hamor. 

Aniya, may mga rekisitos na hinihingi ang DPWH Department Order No. 23, s. of 2015 bago ikunsidera ang pagpapatupad ng anumang proyekto.

Maaalalang kwinestyon ni Andaya ang pagkakaroon ng "zero" budget ng Matnog, Sorsogon na niragasa ng bagyong Usman habang P325-milyon ang makukuha ng Casiguran para sa flood control projects.