Balangiga Bells dapat i-tour – Poe

MANILA, Philippines — Matapos tumanggi ang Diocese ng Borongan sa Eastern Samar na ipahi­ram at ilagak sa Natio­nal Museum kahit isa sa tatlong Balangiga Bells, iginiit ni Sen. Grace Poe na dapat i-share naman ito ng Simbahang Katolika sa pamamagitan ng tour upang makita ng mas maraming Filipino.

Ginawa ni Poe ang pahayag matapos tablahin ng Simbahan ang resolusyon ni Sen. Juan Miguel Zubiri na humihikayat na ilagay sa National Museum ang isa sa mga kampana. 

Ayon kay Poe, wala naman siyang nakikitang masama sa layunin ni Zubiri dahil hindi naman lahat ng mga mamamayan ay makakapunta sa Borongan, Eastern Samar.

Ipinaalala rin ni Poe na ang Kristiyanismo at pagiging Katoliko ay tungkol sa pagbabahagi kaya maaring ipahiram ang isa sa mga kampana sa pamamagitan ng “tour” o pag-iikot nito sa iba’t ibang bahagi ng bansa.

Pero suportado rin ni Poe na ilagak sa Borongan ang tatlong kampana dahil bahagi ito ng kasaysayan ng nasabing lugar.