1-year Martial Law pa pinagtibay ng Kongreso
MANILA, Philippines — Sa ikatlong pagkakataon, inaprubahan ng Kongreso ang hiling ni Pangulong Duterte na muling palawigin ang Martial Law at suspension ng privelege of habeas corpus sa Mindanao.
Sa botong 235-Yes, 28-No at 1-Abstain ay pumayag ang mga Senador at Kongresista na palawigin pa ang Martial Law sa Mindanao mula Enero 1, 2019 hanggang Disyembre 31, 2019.
Sa kanyang statement sa pasimula ng joint session, sinabi ni Executive Secretary Salvador Medialdea na kailangan pa rin ang martial law at suspension of the privilege of the writ of heabeas corpus dahil “hot bed” pa rin ngayon ng mga komunista ang Mindanao bukod pa ang presensiya ng mga terorista.
Dapat din umanong maranasan ng mga taga Mindanao ang seguridad na nararamdaman ng mga taga malayo dito.
Sinabi naman ng bagong talagang AFP Chief of Staff Lt. General Benjamin Madrigal Jr. na mayroong nasa mahigit 2,400 na kalaban ng estado sa Mindanao sa ngayon.
Kabilang na rito ang Abu Sayaff, Bangsamoro Islamic Freedom Fighter, Daulhah Islamia at New People’s Army.
Nangako naman si Medialdea na pananatilihin ang disiplina, pagsunod sa rule of law at walang pang-aabuso sakaling pahintulutan ng Kongreso ang martial law extension.
Sa ilalim ng 1987 Constitution, ang Pangulo lamang ang may kapangyarihang magdeklara ng Batas Militar at suspension of the privilege of the writ of habeas corpus sa anumang panig ng bansa.
Maaari naman itong i-revoke ng Kongreso sa isang joint session sa pamamagitan ng majority, voting jointly.
Magugunitang idineklara ni Pangulong Duterte ang martial law at suspension of the privilege of the writ of habeas corpus sa Mindanao noong Pebrero ng 2017 dahil sa pagsalakay ng Maute-ISIS terror group sa Marawi City.
Nagpasalamat naman ang Malacañang sa pagpabor ng Kongreso sa kahilingan ni Pangulong Duterte na palawigin muli ng isa pang taon ang pagpapatupad ng Martial Law sa Mindanao.
Nilinaw naman ng Ehekutibo na walang budget allocation sa 2019 national budget para sa martial law extension. (Dagdag ulat ni Rudy Andal)
- Latest