‘I-rollback ang tax sa petrolyo!’ – Bam
MANILA, Philippines — Ikinatuwa ni Senador Bam Aquino ang hakbang ng Kamara na simulang talakayin ang mga panukalang nagbabasura sa excise tax sa langis sa ilalim ng Tax Reform for Acceleration and Inclusion (TRAIN) Law at umaasang susunod ang Senado at kikilos para sa tuluyang pag-alis nito.
“Magandang balita na kumikilos na ang Kamara para maitama ang ilang probisyon sa TRAIN Law na dahilan ng pagtaas ng presyo ng bilihin,” wika ni Sen. Aquino.
Umaasa siya na sisimulan na rin ng Senado ang pagtalakay sa kanyang Bawas Presyo sa Petrolyo Bill at sa Joint Resolution No. 15 ng minorya, na kapwa naglalayong suspindihin ang excise tax sa ilalim ng TRAIN Law at itakda ang rollback ng buwis sa antas noong December 31, 2017.
Sinabi ni Sen. Bam na mahalagang maisabatas ang mga nasabing panukala kasunod ng desisyon ng pamahalaan na ipatupad ang pangongolekta ng excise tax sa langis sa 2019 matapos sabihin na balak nila itong ipatigil.
- Latest
