2 kongresista may bilyong ‘pork’ – Lacson
MANILA, Philippines — Dalawang mambabatas ang nabigyan umano ng karagdagang P2.4 bilyon at P1.9 bilyon sa P3.757 trilyon national budget.
Bagaman at hindi pinangalanan, ibinunyag ni Sen. Panfilo Lacson na P2.4 bilyon ang inilaan sa mga proyekto ng isang congresswoman samantalang P1.9 bilyon naman sa isang congressman.
Kinuwestiyon ni Lacson si Sen. Loren Legarda, chair ng Senate Committee on Finance, kung pork barrel ba ang mga isiningit na pondo.
“Now my question is, is this pork or not? Is that pork or pork?” ani Lacson.
Sinabi naman ni Legarda na may karapatan ang mga mambabatas na maglipat at magtanggal ng pondo sa panukala dahil sila ang may tinatawag na “power of the purse”.
Nang sabihin ni Lacson na ang karagdagang pondo ay hindi para sa mga ahensiya kung hindi para sa mga distrito ng mga mambabatas, tinanong ni Legarda kung sino ang mga mambabatas dahil sa tatlong dekada niyang mambabatas wala siyang farm to market roads na pondo.
Sabi ni Lacson, may 69 farm to market roads na proyekto ang congresswoman na aabot sa P500 milyon.
“It’s all there. Naroon sa document. Makikita naman kung saang district. Kayo na lang tumingin,” sabi ni Lacson.
Ayon pa kay Lacson, ang P500 milyon ay bahagi ng P2.4 bilyon na nakita niyang halaga ng insertions.
Nang tanungin kung si Speaker Arroyo ang tinutukoy ni Lacson, sinabi ng senador na tingnan na lamang ang dokumento at kung sino ang district representatives nito.
Idinagdag ni Lacson na hindi niya maaring sabihin na mismong si Arroyo ang nagsingit ng pondo pero kung sino aniya ang kinatawan ng isang distrito ay siya ang nag-aalaga rito.
Idinagdag din nito na ang isang insertion ay sa Camarines Sur na kinakatawan ni Rep. Rolando Andaya.
- Latest