3 DSWD undersecretaries sinibak
MANILA, Philippines — Kinumpirma kahapon ng Malacanang na tatlong undersecretaries ng Department of Social Welfare and Development ang tinanggal nito sa puwesto.
“Opo. Inaasahan naming na magdadala ng sarili niyang team para magbigay ng mas mahusay na serbisyo sa publiko ang bagong kalihim (ng DWSD),” sabi ni Executive Secretary Salvador Medialdea.
Kabilang sa tinanggal ni DSWD Secretary Rolando Bautista sa puwesto sina ina Usec. Maria Lourdes Turalde-Jarabe ng Promotive Operations and Programs Group; Usec. Hope Hervilla ng Disaster Response Management Group; at Usec. Mae Fe Ancheta-Templa ng Protective Operations and Programs Group.
Nilinaw naman ni Medialdea na walang kinalaman ang pagiging maka-kaliwa ng mga ito kaya sinibak sa kanilang puwesto.
Naunang sinabi rin ni Bautista na noong Nobyembre 14 pa ipinadala ni Medialdea ang notice of termination sa tatlong mga opisyal.
Una nang sinabi ni Pangulong Duterte sa Filipino community sa Papua New Guinea noong Biyernes na may tatanggalin daw itong opisyal ng gobyerno pagbalik nito sa bansa.
“May tinanggal akong miyembro ng Gabinete sa isang Cabinet meeting dahil sa pagsisinungaling. May tinatanong ako sa kanya. Did you consult your legal office? Sabi niya, no. Nag-init ang ulo ko, sabi ko – and since then marami na ako until now and when I go back meron na naman. Talagang tanggalin kita, sorry na lang,” wika naman ni Pangulong Duterte sa kanyang mensahe sa Filipino community sa Papua New Guinea.
Bago maglingkod sa nasabing mga puwesto, umupo muna bilang secretary general ng grupong Gabriela si Jarabe. Naglingkod naman bilang regional chairperson ng Bayan Muna si Hervilla, at kasapi naman si Templa ng Forum of Women for Action with Rody Duterte. Itinalaga sila ni Pangulong Duterte sa puwesto noong taong 2016.
- Latest