Faeldon ‘di pa nagre-report sa BuCor
MANILA, Philippines — Hndi pa rin pumapasok sa kanyang bagong assignment sa Bureau of Corrections si BuCor Chief Nicanor Faeldon simula nang maitalaga ito noong Oktubre 12.
Ayon kay Justice Sec. Menardo Guevarra, naipaalam na niya ito kay Executive Secretary Salvador Medialdea sa Cabinet meeting nitong Martes.
Bilang tugon, sinabi raw ni Medialdea na ipapaalam niya ang nasabing bagay kay Pangulong Duterte.
Paliwanag ni Guevarra, hindi makakaganap ng normal na trabaho ang BuCor ng walang director general.
Aniya, bagamat nagtalaga siya ng officer in charge, may mga bagay na hindi ito maaring gampanan, at ang tanging tinututukan lamang nito ay ang pang-araw araw na gampanin o trabaho sa BuCor.
Para pansamantalang mamuno sa BuCor, hinirang muna ni Guevarra si BuCor Deputy Director General Melvin Ramon Buenafe bilang officer-in-charge ng ahensya.
Ang BuCor ay nasa ilalim ng pangangasiwa ng DOJ.
Matatandaan na nagbitiw si Faeldon bilang pinuno ng Bureau of Customs dahil sa isyu ng P6.4 billion shabu shipment na nakapuslit umano sa BOC noong nakaraang taon.
Mula sa BOC, umupo naman si Faeldon bilang Deputy Adminsitrator for Operations ng Office of the Civil Defense.
Noon namang October 12, itinalaga siya ni Pangulong Duterte bilang BuCor Chief kapalit ni dating PNP chief Ronald “Bato” dela Rosa na naghain ng certificate of candidacy sa pagka-senador.
- Latest
