Mandatory pregnancy test sa mga estudyante binatikos
MANILA, Philippines — Kinondena ni Kabataan Rep. Sarah Elago ang kautusan ng isang eskwelahan na magkaroon ng mandatory pregnancy test sa mga estudyante ng Baguio City-Pines City Colleges.
Ayon kay Elago, discrimination at “downgrading” sa karapatan ng mga kababaihan ang ipapatupad na polisiya ng nasabing eskwelahan.
Hindi pa umano binabanggit dito na ang bayad sa nasabing test ay kargo ng mga estudyante na mas mahal pa kaysa sa binibili sa mga botika.
Base sa liham mula sa doktor ng Pines City Colleges na ang mandatory pregnancy test ay gagawin para sa pagsusulong ng education and social responsibility.
Kaya ang mga babaeng estudyante mula sa Colleges of Dentistry, Pharmacy at Nursing ay kailangang sumailalim sa pregnancy test at kailangang magbayad ng P150 na idadagdag sa kanilang school fees.
Iginiit naman ng kongresista na hindi masusukat ng pregnancy test ang kakayahan ng isang estudyante kaya inatasan ni Elago ang nasabing eskwelahan na linawin ang nasabing isyu.
Nagsagawa na rin ng imbestigasyon ang Commission on Human Rights (CHR) sa polisiya ng nasabing paaralan.
Nanindigan naman ang Pines City Colleges na napagkasunduan nila at ng mga estudyante ang nasabing polisiya.
- Latest