Suplay ng bigas dadagsa

Dahil sa importasyon

MANILA, Philippines — Dahil sa pagpapaluwag ng patakaran sa importasyon, tiniyak kahapon ng Department of Trade and Industry (DTI) ang pagdagsa ng suplay ng bigas sa mga darating na araw na magiging dahilan sa pagbaba rin ng presyo nito sa lokal na merkado.

 Sinabi ni DTI Secretary Ramon Lopez na wala nang dapat ipag-alala ang publiko sa suplay ng bigas lalo’t papalapit ang Disyembre dahil sa patakaran ng administrasyon na punuin ang stock ng bigas.

 Iginiit ni Lopez na hindi na baleng sumobra ang suplay ng bigas sa bansa huwag lang kumulang kaya ipinag-utos ang importasyon.

 Pinawi naman ng kalihim ang pangamba na maaagrabyado ang mga lokal na magsasaka sa pagdagsa ng mga imported na bigas dahil sa bibigyan naman umano sila ng mga insentibo.

 Sinabi niya na itinaas ng National Food Authority (NFA) ang presyo ng binibiling palay buhat sa mga magsasaka mula P17 tungo sa P20.70.