Doble seguridad sa Undas
PNP nakaalerto
MANILA, Philippines — Para matiyak ang kaligtasan ng taumbayan, dodoblehin pa ng National Capital Region Police Office (NCRPO) ang seguridad sa mga pampublikong lugar sa Metro Manila habang ginugunita ang araw ng Undas.
Ayon kay NCRPO chief Director Guillermo Eleazar, nauna na silang nagtalaga ng 3,500 pulis sa paggunita sa “Ligtas Undas 2018” mula Oktubre 31 hanggang Nob. 2, 2018 at kanila pa itong dodoblehin.
Nagtatag na rin ang pamahalaan ng “multi-agency cooperation and support mechanism” kasama ang Armed Forces of the Philippines, Metro Manila Development Authority, Bureau of Fire Protection, at mga lokal na pamahalaan para sa seguridad kabilang ang pamamahala sa trapiko sa mga rutang patungo sa mga sementeryo.
Nasa 82 bus terminals, 59 train stations, apat na paliparan, at limang pier din ang kanilang babantayan para makatiyak na hindi malulusutan ng anumang elemento na maaaring manamantala sa okasyon.
Sinabi ni Eleazar na inaasahan nila na sa darating na Martes at Miyerkules dadagsa na ang mga pasahero mula sa Metro Manila sa mga bus terminals na uuwi sa kani-kanilang mga lalawigan.
Pagsapit naman ng mismong Undas, nasa 78 sementeryo at 38 mga kolumbaryo ang magiging pokus ng kanilang pagbabantay para mabigyan ng seguridad ang mga taong magtutungo sa kanilang mga namayapang mahal sa buhay.
Inalerto na rin ni Eleazar ang mga hepe ng mga istasyon ng pulisya at station commanders sa 16 na lungsod at isang munisipalidad sa Metro Manila upang hindi mapagsamantalahan ng mga kriminal ang publiko lalo na iyong aalis sa kani-kanilang mga bahay.
Bukod sa mga pulis, nasa 9,000 force multipliers rin umano kabilang ang mga barangay tanod, security guards at mga miyembro ng mga volunteer groups ang katuwang nila sa pagbabantay.
Nagpaalala ang NCRPO na tiyakin na nakakandado ang kani-kanilang mga tahanan o kaya ay mag-iwan ng mapagkakatiwalaan habang iwasan din ang pag-post sa social media kung saan sila pupunta upang hindi mamonitor ng mga kawatan ang kanilang aktibidad.
- Latest