3,300 pulis ikakalat sa Undas
MANILA, Philippines — Para mapanatili ang kaayusan at kapayapaan habang ginugunita ang araw ng Undas, magtatalaga ang National Capital Region Police Office (NCRPO) ng tinatayang 3,300 pulis sa buong Kamaynilaan.
Sinabi ni NCRPO Chief Director Guillermo Eleazar, bukod sa 3,300 police personnel ay magkakaroon pa rin ng mga naka-standby na puwersa sa mga tanggapan ng pulisya.
Kaya base umano sa talaan ng NCRPO ay aabot sa 5,000 ang magiging force multiplier na tutulong sa kanila, iba’t ibang organisasyon, gayundin ang mga barangay at civil volunteer organizations.
Sinabi pa ni Eleazar na mayroong 80 sementeryo at 30 columbaries sa buong Metro Manila at ang pinakamalaki rito ay ang Manila North Cemetery.
Kaya ngayong darating na Linggo umano ay magsisimula ang pakikipag-ugnayan nila sa mga local government units, sa pamunuan ng ibat ibang sementeryo maging ito man ay pampubliko o pribado, gayundin sa mga lider ng ibat ibang organisasyon.
Sa kabila nito, siniguro naman ni Eleazar na ang kanilang anti-criminality operations ay magpapatuloy sa kabila ng naka-focus sila sa mga sementeryo sa paggunita ng araw ng mga patay.
Bagamat ang konsentrasyon nila ay sa mga sementeryo, kolumbaryo ay babantayin din ng NCRPO ang mga bus terminals gayundin ang seaports, airports, LRT at MRT stations.
- Latest