Bong Go nanindigan
Sa mas malawak na serbisyo sa publiko
MANILA, Philippines — Nanindigan si senatorial aspirant at dating Special Assistant to the President Christopher ‘Bong’ Go na isa lamang siyang ordinaryong taong kakandidato sa pagkasenador sa 2019 na gustong mas palawakin pa ang pagsisilbi sa bayan.
Sinabi ni Go na suportado niya ang mga agenda ni Pangulong Rodrigo Duterte pero tututukan niya ang kanyang adbokasiya na mapabuti ang medical services lalo na sa mga mahihirap sa pamamagitan ng nasimulan na nila ni Pangulong Duterte na Malasakit Center na nagsisilbing one stop shop na tutulong sa mga walang perang pampaospital.
Hangad niyang maisabatas ito upang magtuluy-tuloy na ang Malasakit Center hanggang sa mga susunod na henerasyon kahit wala na sila ng Pangulo.
Samantala, kinumpirma ni Go na malaking factor sa kanyang naging desisyon ang enlightenment mula sa Diyos at ni Pangulong Duterte dahil batid nitong mas makakatulong siya kapag nasa Senado na siya.
Kinumpirma rin ni Go na mahigpit na bilin sa kanya ng Pangulo na panatilihin ang pagiging loyal sa bansa at loyal sa taumbayan.
Ayon kay Go, handa niyang harapin ang mga kritiko ng administrasyon dahil batid niyang marami sa mga botante ang natuto na at matatalino.
Samantala, tiniyak ni Go na sanay siya sa kampanya na maliit lamang ang budget dahil aniya hindi naman sila kasing-yaman ng ibang kandidato.
- Latest