25% shading threshold pinaboran ng PET

MANILA, Philippines — Pinagtibay ng Presidential Electoral Tribunal (PET) ang 25-percent ballot shading threshold kaugnay ng recount sa pagitan nina Vice Pres. Leni Robredo at dating Sen. Bongbong Marcos.

Sa press briefing, sinabi ni Robredo na nakahinga na ng maluwag ang kanyang panig dahil sa ilang buwan ding pagdedepensa sa 25-percent shading na ipinatupad ng Commission on Elections noong 2016 elections.

Ani Robredo, maging hudyat sana ang desisyon sa mas mabilis na usad ng manual recount para tuluyan na umanong maka-move on ang taumbayan sa akusasyon ng dating senador.

Sinabi pa ng PET kay Robredo na sa nagaganap na recount ay wala namang nabawas o nadagdag sa boto.

Ngunit naunang sinabi ni Robredo sa kanyang motion for reconsideration na sa vote counting sa Barangay Laganac sa Balatan, Camarines Sur nakakuha siya ng 358 votes.

Nang ipatupad ang 50 percent threshold, ay na­ging 346 ang boto sa bise presidente habang ang boto ni Marcos ay hindi nagbago.

Ayon naman sa tribunal, “highly premature” sa kampo ng bise presidente na sabihing nagkaroon ng pagkabawas sa mga boto sa kasalukuyang stage ng recount.