Duterte umamin sa sakit
Binawalan nang uminom
MANILA, Philippines — Sa gitna ng isyu tungkol sa totoong lagay ng kalusugan ni Pangulong Rodrigo Duterte, inamin nito mismo na sumailalim siya sa colonoscopy at endoscopy nasa isang linggo na ang nakakaraan.
Ginawa ng Pangulo ang pag-amin sa kanyang talumpati sa Asia Pacific Association of Gastroenterology (APAGE) 3rd Inflammatory Bowel Disease Clinical Forum na ginawa sa Shangri-La, Mactan Resort and Spa sa Lapu-Lapu City, Cebu kamakalawa ng gabi.
Sinabi umano ng doktor na tumingin sa Pangulo na mayroong itong “bad case of Barret” pero mabubuhay siya kung titigil sa pag-inom.
Ayon sa statement ng Malacañang, ang gumawa ng dalawang medical procedures sa Pangulo ay si Dr. Jose Sollano na dumalo rin sa nasabing event.
Si Dr. Sollano ang chairperson ng APAGE at dating presidente ng Philippine Society of Gastroenterology.
Inamin din ng Pangulo na ang kanyang anak na si Sebastian “Baste” Duterte ay nakaranas din dati ng “intestinal problem.”
Ang endoscopy ay non-surgical procedure na ginagawa para masuri ang digestive tract ng pasyente samantalang ang colonoscopy naman ay isang uri ng pagsusuri upang makita ang pagbabago o abnormalidad sa large intestine at rectum.
Matatandaan na ilang personalidad kabilang si Rep. Gary Alejano ang nanawagan na dapat maisapubliko ang totoong lagay ng kalusugan ng Pangulo.
Naging malaking isyu rin ng ihayag ni CPP founder Jose Maria Sison na na-comatose si Duterte na mariin namang pinasinungalingan ng Malacañang.
- Latest